සයිබර් අහස සැරසූ ලොකු ඇස් අයිතිකාරිය
දවස තිස්සේම කැරකෙමින්
කෙඳිරිල්ලක් නඟන විදුලි පංකාව
උණුසුම් සුසුම් සලන
හිතට හරි සංකාව
ඉඳහිට කතා කළ නුඹ
මකා දැමුවේ හුදෙකලාව
අඩක් විවරව තිබූ ජනේලය
ගෙනාවේ කිසිදාකවත් නොලැබුණු
ලෙංගතු හුළඟක පහස
ඉතින් හිතවතිය,
මට මේ දැනෙන්නේ කුමක්දැයි
පැහැදිය හැක්කේ නුඹටමය
දැන් මගේ සවන් ඉල්ලන්නේ
නුඹේ කටහඬය
ලේ කඳුළු ගලා බොරපාට වුණු මගෙ දෙනෙතේ
හටගත්තා වූ නැවුම් අපේක්ෂාව
නුඹේ ඇහිපිල්ලමක් යටට වී
ගුලි වී සිටීමය
නුඹෙන් ගිලිහෙන කඳුළු බිඳුව මමය
නැවතත් උත්පත්තිය ලබා
නුඹේ නැහැයෙන් පිටවෙන
සුසුමත් මමය
එලෙසින් නුඹේ වේදනාව වී
මම පිටමං වෙමි..
නැවත මම පැමිණෙමි
දැනටමත් අපි,
පෙම්වතුන් වී හමාරය !
- රැහැන් මාරා -
Comment with Facebook